ದಿನನಿತ್ಯ ಮದ್ಯ ಸೇವಿಸಿ ಬಂದು ಮನೆಯಲ್ಲಿ ಕಿರಿಕಿರಿ ಮಾಡುತ್ತಿದ್ದ ಮಗನನ್ನು ತಂದೆ ಕತ್ತಿಯಿಂದ ಹಲ್ಲೆ ನಡೆಸಿದ ಘಟನೆ ಕಾರ್ಕಳದ ದುರ್ಗಾ ಗ್ರಾಮದ ಪುಲ್ಲಾಟ್ ನಲ್ಲಿ ನಡೆದಿದೆ. ಗಾಯಾಳು ಮಗ ಚಾಲ್ಸ್ ನನ್ನು ಮಣಿಪಾಲ ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಚಾಲ್ಸ್ ನ ತಾಯಿ ಮನೆಯ ಪಕ್ಕದಲ್ಲಿ ಇನ್ನೊಂದು ಮನೆ ಕಟ್ಟುತ್ತಿದ್ದು, ಸೆ. 28 ರಂದು ರಾತ್ರಿ ಚಾಲ್ಸ್, ಹೊಸ ಮನೆಯನ್ನು ನನಗೆ ಬಿಟ್ಟುಕೊಡಬೇಕೆಂದು ಜಗಳವಾಡುವ ವೇಳೆ, ಬಿಡಿಸಲು ಬಂದ ತಂದೆಯನ್ನು ತಳ್ಳಿ, ಬಳಿಕ ತಂದೆಗೇ ಹಲ್ಲೆಗೆ ಮುಂದಾಗಿದ್ದಾನೆ. ಈ ವೇಳೆ ತಂದೆ ಮಥಾಯ್ ಅಲ್ಲೇ ಇದ್ದ ತೋಟದ ಕೆಲಸಕ್ಕೆ ಬಳಸುವ ಕತ್ತಿಯಿಂದ ನಿನ್ನ ಉಪದ್ರ ಸಾಕಾಗಿದೆ, ನಿನ್ನ ಕೊಂದೆ ಬಿಡುತ್ತೇನೆ ಎಂದು ಕತ್ತಿಯಿಂದ ಚಾಲ್ಸ್ ನನ್ನು ಕಡಿದ ಪರಿಣಾಮ ಚಾಲ್ಸ್ ನ ಕುತ್ತಿಗೆಯ ಭಾಗ ಹಾಗೂ ಎದೆಯ ಭಾಗಕ್ಕೆ ತೀವ್ರ ತರವಾದ ರಕ್ತ ಗಾಯಾವಾಗಿದ್ದು, ತದನಂತರದಲ್ಲಿ ಅಂಬುಲೆನ್ಸ್ ನಲ್ಲಿ ಗಾಯಾಳುವನ್ನು ಮಣಿಪಾಲ ಆಸ್ಪತ್ರೆಗೆ ಸಾಗಿಸಲಾಯಿತು.
ಈ ಬಗ್ಗೆ ಗಾಯಾಳುವಿನ ತಾಯಿ ನೀಡಿದ ದೂರಿನ ಅನ್ವಯ ಕಾರ್ಕಳ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
